The Guardian: Vetëvendosje përfaqëson shpresën për qytetarët e Kosovës
12/06/2017 - 19:46

Vetëvendosje” përfaqëson shpresën për qytetarët e Kosovës të lodhur nga koalicioni i komoditetit midis ish-kryekomandantëve dhe administratorëve ndërkombëtarë, shkruan “The Guardian”, transmeton “Zeri.info” në Kosovë.

Britania e Madhe nuk është vendi i vetëm që ka përjetuar zgjedhje të jashtëzakonshme në qershor. Në Kosovë, një koalicion midis Partisë Demokratike të Kosovës, Aleancës për Ardhmërinë e Kosovës dhe Iniciativës për Kosovën ka përfunduar në vendin e parë me 34% të votave. Një fitore, por jo e mjaftueshme për të formuar një qeveri. Kjo tingëllon si gjë e njohur?

Kjo mund të jetë një lajm i mirë për “Vetëvendosjen”, një lëvizje politike majtiste që prezantoi fjalorin e anti-kolonializmit në përgjigje të administratës neoliberale të pasluftës në Kosovë.

 

Vetëvendosje, që përkthehet si “self-determination”, ka fituar më shumë vende në zgjedhjet parlamentare se çdo parti tjetër politike, duke marrë 26% të votave.

Megjithëse Vetëvendosje do të duhet të zgjedhë një partner koalicioni për të formuar një qeveri, kjo fitore është një ngjarje historike, një fitore mbi koalicionin e “krahut të luftës” të kryesuar nga anëtarë të diskutueshëm të Ushtrisë Çlirimtare të Kosovës.

Përkundrazi, ish-udhëheqësi i Vetëvendosjes Albin Kurti është një emblemë e rezistencës paqësore të Kosovës. Kurti u burgos nga regjimi serb gjatë luftës dhe pas lirimit të tij u kthye në politikë si përgjigje ndaj problemeve të gjata politike dhe ekonomike të Kosovës së pasluftës, përcjell “Zeri.info”.

Duke u përballur me dëshpërimin ekonomik të shkaktuar nga privatizimi i ndërmarrjeve publike, stagnimi ekonomik dhe përpjekjet e shtetit serb për të minuar përpjekjet e pavarësisë së Kosovës, Vetëvendosje doli në skenë më 2004 si një lëvizje autonome e drejtësisë sociale dhe ekonomike për vetëvendosje.

Kritika e saj për konvergjencën e pasluftës së korrupsionit ndërkombëtar dhe lokal rezonuan me qytetarët kosovarë të cilët ishin lodhur nga një koalicion komoditeti midis ish kryekomandantëve dhe administratorëve ndërkombëtarë.

Duke marrë politikën për bazë, aktivistët e Vetëvendosjes punuan me qytetarë të margjinalizuar, duke krijuar një fjalor të ri politik që ofroi një kritikë sistematike të asaj që kishte shkuar keq me administratën e pasluftës në Kosovë.

Vetëvendosja sfidoi si retorikën nacionaliste të heronjve të luftës dhe pretendimin e shtetit serb për Kosovën, transmeton “Zeri.info”.

Fitoret elektorale të lëvizjeve frymëzuese politike majtiste në Ballkan nuk janë të paprecedentë. Në Greqi, fitorja e Syrizas në vitin 2015 dërgoi rreze shprese në rajon me politikën e saj anti-shtrënguese, një ristrukturim ekonomik dhe politik që kërkonte të adresonte kërkesat e kursimit të BE-së. Si kryeministër, Alexis Tsipras e konsolidoi fuqinë e tij.

Megjithatë, Syriza u bë e padallueshëm nga qeveritë e mëparshme liberale në Greqi – nga rënia në presion të BE-së për të shkarkuar ministrin e financave Janis Varoufakis dhe për të transportuar refugjatët në Turqi pas marrëveshjes BE-Turqi, transmeton “Zeri.info”.

Fati i Syrizës duhet të shërbejë si një paralajmërim për turmat e gëzueshme në Kosovë sot.

Vetëvendosje duhet të adresojë varfërinë ekonomike të Kosovës e krijuar nga vitet e reformave në treg dhe privatizimin e pasurisë publike, përkeqësimin e infrastrukturës arsimore dhe shërbimeve sociale dhe mjekësore që kanë performuar më keq se institucionet paralele që ekzistonin nën sundimin serb.

Kritika e saj e privatizimit si “model i korrupsionit, që kontribuon në rritjen e papunësisë, prishjen e ekonomisë dhe ndalimin e zhvillimit ekonomik të vendit” duhet të transformohet në politika – nga shfuqizimi i Agjencisë Kosovare të Mirëbesimit që ka lehtësuar procesin e privatizimit, deri te proceset problematike të prokurimit që kanë krijuar një oligarki të biznesit-politikë.

Për sovranitetin, Vetëvendosje gjithashtu duhet të ndjekë parimin që ka filluar lëvizjen – pa përfshirje të jashtme të BE-së apo konsulentëve të tjerë të pazgjedhur ndërkombëtarë për të vendosur të ardhmen e popullit të Kosovës.

Edhe më e rëndësishme, Vetëvendosje duhet të ndryshojë qasjen e saj ndaj negociatave me Serbinë dhe BE-në, në të cilën Kosova nuk është trajtuar si viktimë e dhunës së shtetit serb, por si kryerës.

Duke qëndruar në parullën e saj “Jo negociata” pa pranimin e krimeve të luftës të shtetit serb në Kosovë, është e rëndësishme jo vetëm për Kosovën, por për të gjitha krimet e sponsorizuara nga shteti dhe ato të vazhdueshme të shtetit që heshtën përmes politikës së “pajtimit”, përcjell “Zeri.info”.

Kjo duhet të përfshijë dëmshpërblimet e luftës dhe çështjen e ratifikimit të kufijve të Kosovës me Serbinë.

Qeveria e re duhet t’ua bëjë të qartë agjentëve ndërkombëtarë se Kosova nuk mund të pritet të negociojë me një vend që refuzon të pranojë krimet e tij të okupimit dhe vazhdon të mohojë të drejtën e Kosovës për të ekzistuar në diskursin e saj zyrtar.

Po aq e rëndësishme, Kosova ka nevojë për një angazhim të ri ndaj minoriteteve romë dhe serb, që nuk udhëhiqet nga institucionalizimi i OKB-së për dallimin etnik, racial dhe fetar të pas luftës, por me integrim gjithëpërfshirës ekonomik dhe politik.

Dhuna ndaj grave dhe komuniteteve LGBTQ – një fenomen i përhapur pas luftës – duhet të trajtohet seriozisht dhe në mënyrë domethënëse përtej zgjidhjeve të modelit të zhvilluara dhe të ofruara nga aparatçikët e BE-së që kanë bërë më shumë dëm sesa dobi, transmeton “Zeri.info”.

Vëzhgimi dhe sekuritizimi i komuniteteve myslimane nëpërmjet projekteve të kundër-radikalizimit nga qeveritë e mëparshme duhet të përfundojnë gjithashtu, pasi me një politikë sekulare ekstreme dhe me varfëri, ata kanë kontribuar në rekrutimin e një pjesë të vogël luftëtarësh nga rinia kosovare.

Kërkesat nga BE duhet të trajtohen me indiferencë për sa kohë që nuk i pranojnë kosovarët si një popull sovran të lirë për të zgjedhur dhe për të përcaktuar të ardhmen e tyre.

Vetëvendosje përfaqëson shpresën për të cilën kosovarët kanë pritur për më shumë se tre dekada. Slogani i saj “# me zemër” ka bërë për veten shumicën e njerëzve të vendit. Le të shpresojmë që kjo është forca politike që udhëheq qeverinë e re në Kosovë dhe mban premtimet e saj. /ZËRI/

Të parët për lajmin e fundit. Ndiqni Oranews.tvFacebook dhe në Twitter

Read previous post:
Helikopterët e Vivas shuajnë zjarrin në pyjet e Rrogozhinës

Close