Mediat serbe: Amerikanët refuzuan kërkesën e Daçiç
06/03/2013, 8:08
Përditesuar: 06/03/2013, 10:48
" frameborder="0" allowfullscreen>

Refuzimi që kryeministri i Kosovës Hashim Thaçi i bëri kërkesës së homologut të tij, Ivica Daçiç të hënën në Bruksel, për krijimin e bashkësisë së nëntë komunave serbe në Kosovë, me kompetenca ekzekutive, ka dëshpëruar politikanët serbë në Beograd e në veri. Ata tashmë shprehen të bindur se Hashim Thaçi  ka mbështetjen e plotë të amerikanëve për të mos lejuar një gjë të tillë.

Gazeta serbe, “Blic”, duke cituar burime nga diplomacia amerikane shkruan se vetëm Shtetet e Bashkuara janë kundër këtij asociacioni, ndërsa shtetet e Quintit janë pro. “Shtetet e Quintit si Gjermania, Franca, Anglia e Italia konsiderojnë se krijimi i bashkësisë së komunave serbe në Kosovë, është i arsyeshëm, por me këtë nuk pajtohen Shtetet e Bashkuara. Ndonëse bisedimet zhvillohen në Bruksel dhe udhëhiqen nga Brukseli, në fund vendimet i marrin amerikanët”, shkruan “Blic”.

Më tej në raport thuhet se “Hashim Thaçi nuk ka pranuar kërkesën e Daçiçit, sepse kështu i kanë thënë amerikanët. E këta të fundit e kanë bërë për shkak se ata e dinë që Serbia nuk do t’i ndërpres bisedimet, sepse ajo është e varur nga ato, nëse do të marrë statusin e kandidatit për BE”.

Vetë kryeministri serb ka thënë para disa ditësh se bisedimet me Prishtinën janë në një fazë shumë të vështirë, pasi sipas tij, zyrtarët e Kosovës nuk duan të pranojnë asgjë që iu ofrohet dhe për këtë ata nuk kanë asnjë presion. Kryeministri serb, gjithashtu ka thënë pas takimit në Bruksel, se kanë biseduar për krijimin e bashkësisë së komunave serbe në Kosovë, por se nuk ka rezultuar me marrëveshje mes palëve.

Si rezultat i kësaj është shtuar frika e politikanëve serbë, atyre që akoma mendojnë se Kosova është Serbi, se po shkojnë drejt humbjes së Kosovës. Liderët ilegalë të veriut, kanë kërkuar edhe largimin e presidentit serb, Tomislav Nikoliç dhe të përfaqësuesit për Kosovë, Aleksandër Vuçiç.

Marko Jakshiç, politikan serb në veri, ka thënë se presidenti Nikoliç ka pranuar se po e shkel kushtetutën e Serbisë pasi po përpiqet që serbët në Kosovë të bëhen me polici e gjyqësor në kuadër të institucioneve të Kosovës.

”Çdo takim në Bruksel shkakton dridhje dhe frikë të serbëve në Kosovë pasi është gjithnjë e më e qartë se Kosova po shkon drejt pavarësisë”, ka thënë Jakshiç.

Nga ana tjetër, politikani serb në veri, Oliver Ivanoviç  mendon se është herët që të shkohet në konkluzione të tilla dhe se, sipas tij, duhet akoma kohë që të arrihet deri te një marrëveshje mes palëve. Ai gjithashtu beson se kërkesa e Daçiçit, për krijimin e bashkësisë së komunave serbe, nëse jo sot, një ditë jo shumë larg do të pranohet.

“Kjo do të ndodh, sepse është kërkesë e arsyeshme, duke pasur parasysh se ata nuk u besojnë institucioneve të Prishtinës. Siç nuk ju besojnë serbët e veriut, njësoj nuk iu besojnë as ata të jugut, vetëm se pozita gjeografike e serbëve të jugut i ka vendosur ata në një situatë më të vështirë, meqë janë të rrethuar me shqiptarë prandaj edhe nuk bëjnë zë, ndërkohë që serbët e veriut janë në një pozitë më të volitshme prandaj edhe rezistojnë”, tha Ivanoviç.

Të parët për lajmin e fundit. Ndiqni Oranews.tvFacebook dhe në Twitter

Komento

Current ye@r *