Assad: Do zbatojmë marrëveshjen për armët kimike
30/09/2013, 8:15
Përditesuar: 30/09/2013, 11:13

Presidenti sirian Bashar al-Assad ka konfirmuar se ai do të zbatojë plotësisht marrëveshjen e OKB-së për armët kimike. Në një intervistë për mediat e huaja ai gjithashtu tha se beson se biseda në telefon mes presidentit amerikan Barak Obama dhe Presidentin e ri të Iranit Hassan Rohani mund të ketë një efekt pozitiv në rajon.

“Ne iu bashkuam marrëveshjes ndërkombëtare për të parandaluar përdorimin dhe blerjen e armëve kimike përpara se rezoluta të dilte në dritë. Pjesa kryesore e inisiativës ruse është mbështetur në vullnetin tonë. Kështu që nuk ka të bëjë me rezolutën, por me vullnetin tonë. Natyrisht që ne kemi vullnetin sepse në vitin 2003 ne kemi propozuar në Këshillin e Sigurimit të Kombeve të Bashkuara të heqim këto armë në Lindjen e Mesme për të patur një zonë pa armë kimike në Lindjen e Mesme”, deklaroi al-Assad.

Ndërkohë grupi i parë prej 20 inspektorëve të armatimit kimik pritet që sot të niset për në Damask . Të premten Këshilli i Sigurimit iKombeve të Bashkuara urdhëroi që Organizata për Ndalimin e Armatimit Kimik  ta ndihmoj Sirinë në shkatërrimin e armatimit kimik, deri në mes të vitit 2014.

Ekipi i kësaj organizate shpreson të ndertoj raport gjithpërfshirës për Sirinë deri në fund të muajit tetor.

Siria ka pranuar se ka armatim kimik, pas sulmit me gaz helmues në një lagje të kryeqytetit Damask, ku  u vranë qindra civilë. Për këtë sulm, Uashingtoni ka fajësuar regjimin e Asadit dhe është kërcënuar me aksion ushtarak.

Komento