Vettingu, KPK zbardh pronat e gjyqtarit Artan Laze

Komisioni i Pavarur i Kualifikimit ka marrë në shqyrtimin dosjen e gjyqtarit të Gjykatës së Tiranës, Artan Laze. Në raportimin e bërë rezulton se ai ka deklaruar dy apartamente në Tiranë, një me një sipërfaqe prej 158 metra katrorë dhe një tjetër 120 metra katrorë, tokë në Porto Romano dhe një automjet të blerë nga KQZ.

Në raportimin e bërë Komisioni ka konstatuar parregullsi në vitin e blerjes së një apartamenti, diferenca në blerjet e banesave por edhe në shitjen e njërës prej tyre.

Në apartamentin e parë diferenca shkon në 9 mijë euro dhe në të dytin KPK konstaton blerjen me 4 milion lekë dhe deklarimin me 53 mijë euro.

Po ashtu është konstatuar mosdeklarimi i shpenzimeve për shkollën që vajza e gjyqtarit ndjek në një Kolegj privat.

Në sallë gjyqtari dhe avokati kanë pranuar se ka gabime njerëzore në deklarim dhe për këtë ka konstatuar dhe një rast të KPK ku viti ishte shënuar 1011 dhe jo 2011.

Pas seancës, vetë Laze ka shprehur besimin se do të kalojë vettingun, ndërkohë e ka ngritur shqetësimin se gjyqtarët që kanë kaluar në procesin e verifikimit janë kërcënuar prej kriminelëve për shkak të dënimeve që kanë dhënë më parë.

Laze: Është fakt i njohur gjerësisht kur u shkëputa si gjyqtar dhe isha pjesë e KQZ, jam kërcënuar. Ka shkrime nga njerëz që unë jam dënuar. Me këtë doja të jepja një mesazh që jo vetëm për mua por edhe për shumicën e gjyqtarëve që kanë dhënë drejtësi. Këta që janë dënuar kush i ka dënuar? Ne i kemi dënuar. Sidomos në këtë pjesë, KPK duhet të ketë shumë kujdes. Nuk them që të shmanget hetimi i së vërtetës por të shikohet edhe kjo.

KPK ka vendosur të zhvillojë seancën e rradhës në 11 korrik kur dhe pritet të bëhet publik vendimi i marrë ndaj tij. 


EMISIONET