Shqiptarët e Luginës ndjehen të huaj në Kosovë

Shqiptarët e Luginës ndjehen të huaj në Kosovë

Ka shumë kohë që janë shpërngulur nga Lugina e Preshevës në Kosovë, por ende nuk posedojnë lejeqëndrim, e lëre më nënshtetësi të Kosovës.

Qyetetarët e Luginës së Preshevës, që jetojnë në Kosovë, thonë se kanë aplikuar shumë herë për një lejeqëndrim, mirëpo, siç thonë ata, janë maltretuar me dokumentacione të shumta.

Sipas Ministrisë së Punëve të Brendshme, shumë shpejt do të hartohet një udhëzim administrativ, që të rregullohet statusi i tyre.

Tash e tetë vjet ai qëndron në Prishtinë. Ani pse ka kaluar kohë e gjatë, ende nuk konsiderohet shtetas i Kosovës.

Si student ishte shpërngulur nga Bujanoci në Prishtinë, mirëpo vazhdimisht ka hasur në probleme, për shkak të dokumenteve.

Kushtrim Asllani, aktor, tregon se ka tentuar shumë herë me radhë të aplikojë për lejeqëndrim, megjithatë thotë se vetëm është maltretuar.

“Nuk kam dokumente të Kosovës, kam dasht me apliku disa herë për lejeqëndrim, por ka pas shumë procedura, shumë të mundimshme, tepër të panevojshme. Dhe si student e kam pas shumë problem, me i siguru qato dokumente, sa i përket pronës, tu e dit që nuk kom pronë këtu… Kështu që e kam pas shumë problem me i siguru ato dokumente, që për mua personalisht janë shumë të panevojshme”, tha Asllani.

Shkaku i mungesës së lejeqëndrimit dhe nënshtetësisë, Asllanin e kanë penalizuar shumë herë edhe në projektet e tij si aktor.

Duke shtuar se sa herë që ka dashur të aplikojë, i kanë kërkuar mbi 13 dokumente.

“Thuajse çdo projekt që e kam bo deri tash, sa i përket projekteve profesionale, e kam pas problemin e pagesave edhe të nënshtetësisë. Gjithë më kanë kërkuar, lejeqëndrim të Kosovës, letërnjoftim, banimin…  Kam pas problem edhe me bankat, për shkak që banesat kanë ndërru, nuk jam kanë në të njëjtën banesë. Edhe transferat e banesës më kanë vonuar, ose më kanë nxjerr problem. Është deshtë me shku me i verifiku ato dokumente të mëhershme, po flas për dokumente të Serbisë që i kom”, shtoi Asllani.

Sipas drejtorit të Departamentit për Shtetësi, Azil dhe Migracion, Valon Krasniqi, në bazë të Ligjit të vjetër për të huaj, u është pamundësuar që banorët e Luginës të pajisen me lejeqëndrim.

Sipas tij, tashmë janë duke hartuar një udhëzim administrativ për të rregulluar statusin e tyre.

“Ne si departament jemi përballur shumë herë me kërkesa nga ana e tyre për t’u pajisur me leje qëndrim apo me dokumente tjera të Kosovës. Mirëpo, ligji i vjetër u pamundësonte një gjë të tillë për t’u pajisur, për shkak se nuk i plotësonin një pjesë të kritereve të cilat ishin në ligjin për të huaj. Tani me këtë udhëzim parashihen të krijohen disa lehtësira, në mënyrë që statusi i tyre të rregullohet një herë gjithmonë “, tha Krasniqi.

Ky udhëzim administrativ, sipas Krasniqit  do të hartohet deri në fund të këtij viti.

Ai ka pohuar se si shkak i mos pajisjes me lejeqëndrim, banorët e Luginës së Preshevës, por edhe banorë nga vendet tjera, kanë hasur në shumë vështirësi.

Ndërsa, për Kushtrim Asllanin dëshira e vetme mbetet që një herë e përgjithmonë të rregullohet një gjë e tillë. Ai ka shtuar se institucionet e vendit po premtojnë shumë, e në anën tjetër, banorët e luginës vazhdimisht po diskriminohen. /kp


EMISIONET