Forcat operacionale të policisë së shtetit Renea dhe FNSH kanë zbarkuar në orët e para të së premtes, (14 shtator) në Rremas të Lushnjes, në një operacion për kapjen e të shumëkërkuarve Laert Haxhiu dhe Orges Bilbili, të dy persona të njohur me rekorde kriminale dhe autor të dyshuar të masakrës së 11 shtatorit 2017, ku humbën jetën Jurgen Hoxha dhe Samir Latifi. 

Rreth orës 05.30 minuta forcat e rendit kanë rrethuar banesën e 77 vjecarit Haxhi Lika, pas informacioneve se në të strehoheshin dy të shumëkërkuarit. 

Sipas policisë 77-vjeçari Lika nuk i është përgjigjur thirrjes së policisë për të dalë nga banesa dhe ka dalë në dritare me një armë gjahu në dorë.

Policia thotë në deklaratën e saj se Forcat Speciale kanë qëlluar në ajër për paralajmërim dhe i kanë bërë sërish thirrje të moshuarit të dalë nga banesa. 

Në këtë moment në rrethana që për policinë janë ende të paqarta, ai ka marrë një plumb në kokë dhe aktualisht ndodhet ne spital jashtë rrezikut për jetën. 

"Në momentin që Policia ka bërë rrethimin e banesës dhe konform gjithë procedurave standarde të ndërhyrjes, shtetasi H.L., nuk i është përgjigjur thirrjes së Policisë, por ka dalë në dritare me një armë në dorë (rezultoi armë gjahu). Ndodhur në këto kushte Policia ka qëlluar në ajër duke i bërë thirrje përsëri shtetasin H.L., për të dalë nga banesa. 

"Në rrethana ende të paqarta shtetasi H.L., është dëmtuar në kokë dhe ndodhet në spital jashtë rrezikut për jetën. Eksperti mjeko-ligjor po punon për përcaktimin e shkakut të dëmtimit dhe rrethanat." informoi sot ne mesdite policia e shtetit. 

Versioni i familjareve 

Por familjaret pretendojnë të kundërtën. 

Sipas Haziz Likes, nip i Haxhiut ky i fundit ka qenë shtrirë ne krevat kur është qëlluar.

Haziz Lika: "Rreth orës 04:00 erdhi policia, forcat RENEA. Bënë kontroll. Qëlluan me armë, vranë xhaxhanë brenda. Kontrolluan banesën por nuk gjetën asgjë. Nuk na thanë asgjë.  Dy djemtë e xhaxhait janë ndaluar. Nuk dimë gjë për ta. 

Nipi i 77 vjeçarit thotë se policia ka bastisur banesën e xhaxhait te tij, por ku nuk ka gjetur asgjë dhe nuk ka dhënë asnjë sqarim për familjarët

"Pas kontrollit ikën nga ora 08:00 morën dhe dy djemtë e xhaxhait. Nuk dimë çfarë bëhet me ta."

Dy djemtë e Haxhi Likës, Arbeni dhe Martini janë marrë nga policia për sqarime të metejshme për ngjarjen, ndërsa familjarët pretendojne se janë të pafajshëm dhe kërkojnë drejtesi për të plagosurin. 

Në dritaren e dhomës së Haxhiut nga jashtë ka dy hyrje plumbash një në dritare dhe një në mur ndërsa brenda dhomës një plumb ka rënë në murin përballë dhe nje tjetër më poshtë ka goditur Haxhi Likën që ndodhet në Tiranë në Spitalin Ushtarak.

Policia bën me dije se eksperti mjeko-ligjor po punon për përcaktimin e shkakut të dëmtimit dhe rrethanat e ngjarjes.










/Ora News.tv/