PD: Rama i dha vëllait Olsi monopolin e kontrollit të tregut të bixhozit
Partia Demokratike, nëpërmjet deputetes Jorida Tabaku, akuzoi sot kryeministrin se i ka dhënë vëllait të tij, Olsi Rama, monopolin e kontrollit të tregut të bixhozit. Sipas Tabakut, tarifa që pikat e basteve do të paguajnë për mirëmbajtjen me hyrjen në fuqi të ligjit nuk do t’i shkojë buxhetit, por kompanisë së vëllait të kryeministrit.
Jorida Tabaku: "Ajo që dihet deri tani është se me ligjin e vitit 2015, Edi Rama detyron pikat e basteve të bëjnë pagesën e mirëmbajtjes së sistemit jo në shtet, por tek kompania konçesionare. Kjo do të thotë se sa më shumë pika bastesh të operojnë në Shqipëri, aq më i madh është fitimi i kompanisë konçesionare që, zyrtarisht, operon në emër të ortakut të vëllait të kryeministrit. Kjo është arsyeja pse në treg, në vitin 2013 ishin 928 pika bastesh dhe 4 vjet pas ardhjes në pushtet të Edi Ramës, pikat e basteve janë katerfishuar, duke numëruar 4230 pika bastesh."
Deputetja demokratike, thotë se Ligji ul taksat për bixhozin nga 25 përqind që ishte në 2013-ën, në 15 përqind.
Jorida Tabaku: Edi Rama jo vetëm nuk i largoi pikat e bixhozit nga qytetet dhe nga shkollat, por u uli atyre taksat në mënyrë të ndjeshme. Kur ligji të hyjë në fuqi në 1 janar 2019, tatimi mbi fitimin e biznesit të bixhozit nuk do të jetë më 25 përqind, por gati është përgjysmuar, në 15 përqind.
Partia Demokratike tha Tabaku, është e vendosur të anulojë çdo ligj selektiv apo çdo konçesion që është monopol.