Gjykata liron mjekët e spitalit të Shkodrës, përqafimi në sallën e gjyqit
Gjykata e Shkodrës i la të lirë mjekët e spitalit rajonal, të arrestuar dy ditë më parë për akuzën e "shpërdorimit të detyrës".
Seanca maratonë zgjati 3 orë dhe trupa gjykuese e kryesuar nga gjyqtari Hasan Selimi vendosi të japa masa më të lehta sigurie, jo arrest me burg siç kërkoi organi i akuzës, i përfaqësuar nga prokurorja Blerta Hamza.
Për mjekun kardiolog Luan Dragusha u dha masa e sigurisë "Liri pa kushte", për ish drejtorin e spitalit Përparim Çela liri kundrejt garancisë pasurore prej 500 mijë lekësh dhe mos ushtrim i detyrave të shërbimit administrativ pranë spitalit.
Detyrim me paraqitje për infermierin Renato Kepi, liri me garanci pasurore për farmacisten Karmen Kaçulini dhe pezullim i ushtrimit të detyrës administrative pranë spitalit, liri me garanci pasurore u dha edhe për Amanda Matlijan dhe Juliana Zhurin, ndërsa për Albana Mehmetaj asnjë masë.
Dy mjekët e tjerë, Dhurata Uruçi dhe Edi Smajlaj vijojnë të jenë në kërkim policor.
Perqafimi- Vendimi u prit mes lotësh nga të afërmit dhe kolegët e mjekëve që qëndruan gjatë të gjithë kohës jashtë dyerve të gjykatës.
Pasi u njohën me lirimin e mjekëve, ata u lejuan të ngjiten në sallë, ku nuk mungojnë as përfaqimet dhe lotët, video që Ora News e ka siguruar të momentit kur familjarët takojnë mjekun Dragusha.
Seanca- Në seancë avokatët mbrojtës e kundërshtuan që në nisje veprimin që kishte kryer prokuroria dhe policia, duke argumentuar se mjekët janë porositës të medikamenteve sipas nevojave vjetore të spitalit, ndërsa tenderin e kryen ministria dhe më pas kalon në filtrin e drejtorisë së spitalit.
Gjithashtu ato theksuan faktin se në farmacinë dhe depon e spitalit janë gjetur këto pajisje, duke shpjeguar më pas në detaje me gjuhë mjekësore edhe veprimin që ndiqet në rastin e një operacioni mjekësor të koronarografisë.
Prokuroria i arrestoi mjekët me akuzën e shpërdorimit të detyrës pas një hetimi dy mujor, duke theksuar se në fund të vitit 2016, porositën 400 pako barnash për repartin e hemodinamikës, ndërsa bënë vetëm 3 operacione.
Arrestimi dy ditë më parë
Një pacient që qëndroi jashtë gjykate për të pritur këtë vendim, i tha mediave se prej 3 ditësh kërkon ndihmë mjekësore në spital pasi vuan nga zemra, por nuk ka patur specialistë.
Brenda 10 ditësh prokuroria mund të apelojë vendimin e shkallës së parë.