Lamtumirë profesor, përcillet me homazhe akademiku Alfred Uçi
Bota akademike është në zi. Profesor Doktor Alfred Uçi është përcjellë me homazhe për në banesën e fundit. Miq, kolegë dhe krerët e shtetit e politikës u përulën para trupit të akademikut për të nderuar jetën dhe veprën e tij.
Alfred Uçi ndaloi për herë të fundit në Akademinë e Shkencave.
Kolegë, miq e familjarë, por edhe krerët e shtetit e politikës u përulën për ti dhënë lamtumirën filozofit që u nda nga jeta në moshën 89 vjeçare.
Mes tyre kryeministri Edi Rama, kryetari i Kuvendit Ilir Meta dhe Ministrja e Arsimit Lindita Nikolla.
Presidenti i Republikës, Bujar Nishani, shprehu ngushëllimet përmes një mesazhi.
Nishani: Me largimin e Tij nga kjo jetë, filozofisë, letërsisë, kulturës dhe akademizmit shqiptar do t'i mungojë pamasë ky personalitet i rrallë dhe aq i vyer, i cili la gjurmët e veta të pashlyeshme në disa fusha të dijeve albanologjike duke mundësuar njëkohësisht edhe zhvillimin e mëtejshëm të mendimit shkencor filozofik shqiptar. I përjetshëm qoftë kujtimi i Profesor Uçit dhe shpirti i tij u prehtë në paqe!"
Akademiku Alfred Uçi, profesor i Filozofisë dhe Estetikës ka mbajtur ndër vite disa funksione të larta shtetërore, mes tyre edhe Ministër i Kulturës.
Uçi ka botuar disa monografi dhe studime në fushën e estetikës dhe është vlerësuar tre herë me çmimin e Republikës të shkallës së parë.