Koordinatori i DASH për terrorizmin takim me Xhafajn: Shqipëria partner i rëndësishëm

Koordinatori i DASH për terrorizmin takim me Xhafajn: Shqipëria

"Bashkëpunimi me Shqipërinë në luftën kundër terrorizmit dhe ekstremizmit të dhunshëm do të shërbejë si një gur themeli për vijimin e kësaj marrëdhënie të ngushtë edhe në të ardhmen".

 Deklarata bëhet nga koordinatori Kundër Terrorizmit në Departamentin Amerikan të Shtetit, z.Nathan A. Sales, i cili zhvilloi një takim me ministrin e Brendshëm, Fatmir Xhafaj.

"Shqipëria pavarësisht se ka patur një numër të ulët të luftëtarëve të huaj të përfshirë në konflikte jashtë vendit të vet, mbetet sipas përfaqësuesit të DASH, një partner tepër i rëndësishëm në rajon në këtë kuadër", tha ai, sipas deklaratës së Ministrisë së Brendshme.

Gjatë bisedës, Xhafaj e njohu zyrtarin e lartë amerikan me strategjinë e palës shqiptare për të parandaluar ekstremizmin e dhunshëm, përmes një marrëdhënie të re të ndërtuar mes Policisë dhe Komunitetit.

Koordinatori Sales tha se terrorizmi si një sfidë globale kërkon përkushtim dhe përgjigje të bashkërenduar e globale. Ai deklaroi se mes dy vendeve ka një marrëdhënie bashkëpunimi të ngushtë në vite, në fushën e zbatimit të ligjit dhe ndjekjeve penale, si dhe mbajtjen nën kontroll të elementëve të dyshuar si të përfshirë në luftëra në vende të treta, apo akte terrori.

Gjithashtu në fokus të bisedës ishte menaxhimi dhe siguria e kufirit. Ministri prezantoi arritjet dhe nevojat, sa i takon rritjes së kapaciteteve teknologjike që kanë të bëjnë me mirë administrimin dhe përpunimin e informacionit, veçanërisht të atyre të përfshirë në veprimtari të paligjshme, e gjitha kjo në funksion të parandalimit, identifikimit të individëve me prirje ekstremiste dhe terroriste.

Z. Xhafaj shtoi se kontributi i SHBA-ve ka qenë vendimtar në sukseset e arritura.

EMISIONET