Në vijim të operacionit “Krasta”, është vënë në pranga autori i dyshuar i vrasjes së babë e bir në Elbasan, në vitin 2012.

Policia bën me dije se arrestimi i shtetasit me iniciale E. C., 28 vjeç, banues në Elbasan u bë në Rimini të Italisë gjatë paradites së sotme.

“Ky shtetas ishte shpallur në kërkim ndërkombëtar pasi Gjykata e Rrethit Gjyqësor Elbasan, me vendim penal nr. 480, datë 12.06.2019, ka vendosur masën e sigurisë “Arrest në burg” për veprat penale “Vrasja në rrethana të tjera cilësuese” dhe “Mbajtja pa leje e armëve të zjarrit dhe municioneve luftarake”, në lidhje me vrasjen e shtetasit G. B., (alias A. M.,) dhe të babait të tij shtetasit N. B., ngjarje e ndodhur më datë 15.08.2012 në lagjen “Çlirimi” Elbasan”, - njofton policia.

Arrestimi i tij u bë i mundur falë bashkëpunimit të Task-Forcës Speciale, në Departamentin e Policisë Kriminale, DVP Elbasan, Interpol Tiranës me Zyrën Ndërlidhëse të Oficerëve Italianë në vendin tonë dhe me Interpol Romën, ndërsa pritet që i arrestuari të ekstradohet në Shqipëri.

Në kuadër të operacionit "Krasta", i cili vijon ende, më 14 qershor u arrestuan dhe u ndaluan 10 persona, si dhe u shpallen në kërkim 5 shtetas të tjerë, ndër ta edhe shtetasi i kapur sot në Itali.

Në foto viktima Gentian Beqiraj

/Ora News.tv/