Investitorët e huaj në një zë i kanë kërkuar politikës që të ndalë krizën.

Dhoma Amerikane e Tregtisë në Shqipëri, Shoqata Gjermane e Industrisë dhe Tregtisë në Shqipëri dhe Dhoma Ndërkombëtare e Tregtisë  deklarojnë se po ndjekin me shqetësim të thellë situatën aktuale politike në Shqipëri.

Ndërsa theksohet se shumë nga anëtarët tanë kanë shprehur frustrim lidhur me pasigurinë politike që po ndikon drejpërdrejtë negativisht në klimën e biznesit dhe ekonominë shqiptare.

Bizneset e huaja që operojnë në Shqipëri i bëjnë thirrje të gjitha partive politike që të gjejnë një zgjidhje për këtë situatë në mënyrë që të mos kthehen në një pengesë për investimet ndërkombëtare.

Deklarata e përbashkët

Dhoma Amerikane e Tregtisë në Shqipëri (AmCham), Shoqata Gjermane e Industrisë dhe Tregtisë në Shqipëri (DIHA) dhe Dhoma Ndërkombëtare e Tregtisë (ICC) po ndjekin me shqetësim të thellë situatën aktuale politike në Shqipëri. Shumë nga anëtarët tanë kanë shprehur frustrim lidhur me pasigurinë politike që po ndikon drejtpërdrejt negativisht në klimën e biznesit dhe ekonominë shqiptare.

Ne i bëjmë thirrje të gjitha partive politike që të gjejnë një zgjidhje për këtë situatë. Çdo ditë që kalon pa marrëveshje dëmton besimin e qytetarëve në sistemin tonë politik dhe ekonomik, duke penguar investimet e mundshme ndërkombëtare. Komuniteti ynë i biznesit kërkon fuqishëm që të gjithë palët e përfshira - veçanërisht Qeveria dhe Opozita - të veprojnë me përgjegjësi dhe të bëjnë çdo përpjekje për t'i dhënë fund ngërçit politik në dobi të stabilitetit në vend.

/Ora News.tv/