Hetimet ndaj Ervin Salianjit do mbyllen më 20 mars

Hetimet ndaj Ervin Salianjit do mbyllen më 20 mars

Gjykata e Tiranës ka urdhëruar prokurorinë që brenda datës 20 mars të përfundojë hetimet për çështjen ndaj deputetit të PD-së Ervin Salianji. 

Vendimi është shpallur të hënën pas padisë së bërë nga deputeti i PD i cili ka kundërshtuar vendimin e prokurorisë për zgjatjen e hetimeve. 

Avokati i Salianjit, Ledio Braho, tha se gjykata i la afat akuzës deri më 20 mars duke argumentuar se shtyrjet e hetimeve deri tani kanë qenë të pa justifikuara.

"Në këtë mënyrë i jepet fund intimidimit që organi i prokurorisë bën ndaj opozitës lidhur me mbajtjen e personit nën hetim Ervin Salianji" u shpreh avokati.

Afati përfundonte në prill dhe avokati kërkoi në gjyq anulimin e vendimit për zgjatjen e afateve me pretendimin se prokuroria donte të zvarriste çështjen duke mbajtur Salianjin në hetim.

"Prokuroria kërkonte rimarrjen në pyetje të personit në hetim Fredi Alizotin pasi sipas prokurorisë kishte ndryshuar disa herë deklarimet. Normalisht kjo nuk është arsye për aq kohë sa Fredi Alizoti ka treguar më shumë se një herë se ndryshon deklarimet. Kjo nuk mund të sjellë pasoja për persona të tjerë në hetim" u shpreh avokati Braho.

Ndërkohë burime nga organi i akuzës kanë bërë me dije për Ora News se së shpejti dosja do të dërgohet për gjykim.  Shtyrja e afateve ishte edhe për faktin se prokurorët ishin në pritje të mbërritjes së Albert Veliu i njohur ndryshe si Babalja, i cili mendohet se ka mbërritur ne Belgjike ku ka kërkuar dhe azil politik. Veç deputetit të dorëhequr në hetim janë dhe Albert Veliu dhe i afërmi i tij që imitoi zërin e Agron Xhafës, Fredi Alizoti dhe gazetari Jetmir Olldashi.

  

EMISIONET