BSH: Sistemi bankar nuk e mbështet financimin e sektorit bujqësor
Kreditimi i bankave për ndërmarrjet bujqësore në vend mbetet në nivele minimale duke krijuar vështirësi për zhvillimin e këtij sektori. Në një vrojtim të realizuar nga Banka e Shqipërisë ka rezultuar se rreth 80 % e ndërmarrjeve nuk e kanë zgjeruar aktivitetin dhe nuk kanë në plan rrisin investimet. Ndërkohë si problematikë kryesore në punën e tyre kanë deklaruar se është gjetja e tregut dhe konkurrenca.
Ndërmarrjet bujqësore në Shqipëri janë në një situatë ngërçi. Banka e Shqipërisë ka publikuar një vrojtim ku theksohet se këto biznese hasen më një sërë vështirësish. Kreditimi vijon të mbetet një ndër pengesat kryesore për këtë sektor.
Vetë sipërmarrjet deklarojnë se se barra e huasë është e shtrenjtë dhe raportojnë se 66% e rasteve të aplikimit për financim nuk janë miratuar.
Ndërmarrjet bujqësore me hua shprehen se kryesisht e kanë marrë nga bankat, nga persona fizikë dhe nga institucione financiare jobanka. Huaja e marrë është përdorur më së shumti për të përballuar shpenzimet korrente.
Ndërmarrjet bujqësore pohojnë se përgjithësisht shitjet dhe rezultati financiar gjatë 2017 ka mbetur i pandryshuar ose ka rënë në krahasim me atë të një gjashtëmujori më parë.
Përsa i përket zgjerimit të aktivitetit apo investimeve, pjesa më e madhe e ndërmarrjeve bujqësore (79% e tyre) pohojnë që as nuk e kanë zgjeruar aktivitetin dhe as nuk do ta ndryshojnë aktivitetin apo investimet. Ndërmarrjet bujqësore evidentojnë se faktorë të tjerë si gjetja e tregut, konkurrenca dhe kostoja e financimit janë ndër problemet kryesore me të cilat ato janë përballur.