Basha 7 kushte Ramës: Vettingu u sabotua, po përdoren dy standarde

Basha 7 kushte Ramës: Vettingu u sabotua, po përdoren dy standarde

Kryetari i PD, Lulzim Basha pas thirrjes së LSI për dialog për reformën në drejtësi doli përpara mediave dhe renditi 7 kushte që sipas tij mund ta kthejnë vendin në normalitet.

Zhbërja e ligjeve të paketës së miratuar pas 22 korrikut dhe ndërprerja e mandatit të kryeprokurores së përkohshme ishin thelbi i deklaratës së tij.

Basha: Nëse ka një shans për të shpëtuar reformën në drejtësi ky është t'i rikthehemi konsensusit të 21-22 korrikut dhe të marrin masat për ti dhënë fund paligjshmërisë në organin e Prokurorisë, për të pasur një Gjykatë Kushtetuese funksionale, për ti dhënë fund paligjshmërisë në përzgjedhjen e KLP dhe KLGJ, për të pasur një proces vettingu të pandikuar politikisht.

Basha tha se ligji i propozuar nuk zgjidh asgjë, ndërsa akuzoi e shkolla e magjistraturës është kthyer në vegël politike.

Basha: Pasi vuri bordin me të emëruarit e vet dhe ata emëruan emrat që i dërgoi Edi Rama tani ajo është si shkollë partie.

Duke folur për vettingun Basha tha se këtë proces mazhoranca e sabotoi që në fillim, ndërsa shtoi se po përdoren standarde të dyfishta.

Basha: Më i paanshëm është fondi Qemal Stafa sesa Shkolla e Magjistraturës . Procesi është sabotuar në nisje nga mazhoranca, ata që ishin garant që kjo nuk do të ndodhte qepën gojën dhe mbyllën sytë dhe mbyllën veshët. Së dyti procesi i vettingut është kritikuar qartë nga ONM për raste të vecanta. Kritikat e ONM nuk janë marrë parasysh. Së treti procesi i vettingut po rezulton me standarde të dyfishta. Për të njëjtën shkelje një prokuror dhe gjyqtar shkarkohet, një tjetër mbahet në detyrë.

Përtej 7 kushteve Basha tha se ata që në krijuar kolaps në drejtësi duhet të mbajnë përgjegjësi, ndërsa gishtin e akuzës e drejtoi nga kryeministri për të cilin tha se nuk i intereson shteti ligjor.

EMISIONET